Fernandezek azaldu du ez dakiela ziur, baina seguruenik saldu egingo duela autoa, badaukalako beste bat etxean. Pozik agertu da giltzak emateko ekitaldian, eta zozketan egondako parte-hartze altua nabarmendu du. "Urtero parte hartzen dut zozketan, Durangaldeko herritarren gehiengoa bezala", esan du Zinebi zine jaialdiko zuzendaria denak, zozketak duen zabalpena erakusteko.
400 bat familiari laguntzeko
Izan ere, Fernandezek eta beste milaka lagunek JAED elkartearen ekinbide solidarioa lagundu dute txartelak erosiz. Aurten 60.000 boleto saldu dituzte, eta diru kantitate garrantzitsua izango da elkartearen urteko lana finantzatzeko. Maria Eugenia Unzillak eta Eugenio Briñasek esan dute urtean zehar 400 bat familiari ematen dietela laguntza, jatekoa emanez eta bestelako beharrizanetan esku bat botatzen. Esaterako, pobrezia energetikoari aurre egiteko kanpaina bat ere garatzen dute.