anboto.org

Serie digitala, XXI. mendeko ikus-entzunezko formatua

  Kultura  Durangaldea

Azkenaldian egindako hainbat ikerketek frogatu dute gazteria ohiko telebista kateetatik urruntzen ari dela, eta ikus-entzunezkoak kontsumitzeko bestelako plataformak nahiago dituztela. Horren eraginez, telebista-kateak eta ikus-entzunezko ekoizpen etxeak etorkizuneko estrategia berriak planteatzen ari dira.

Hori kontuan izanik, Next Station plataformak ekimen aitzindaria jarri du martxan estatuan, lehiaketa baten bitartez proiektu digital bat grabatzeko aukera eskainiko baitu. Edonork har dezake parte lehiaketan; nahikoa da sare sozialen bidez proposamenaren bideo bat bidaltzea. Abenduaren 15a izango da ideiak bidaltzeko azkenengo eguna, ideiak Facebook bidez bidali behar dira: https://es-es.facebook.com/NextStation.club/ (@nextstation.club).

Ideiak selfie erako bideo batean edo bideo narratibo batean bidal daitezke. Gehienez ere minutu batekoa izango da eta proiektuaren garapena edo ideiaren berezitasuna azalduko dira bertan.

Ekimenak, Euskadin ikus-entzunezko digitalen sektorea bultzatzea du xede. "Badaude beste ekimen batzuk" diote Next Station-eko antolatzaileek, baina Estatu mailan "bakarra" da "hautatutako proiektuari serie digital bat grabatzeko aukera ematen diona". Lehiaketaren irabazleak sei atal dituen euskarazko telesail digitalaren denboraldi osoa filmatuko du.

Aurkezten diren ideia guztien artean hogei aukeratuko dira lehenik, eta ostean, horietatik hiruk izango dute aukera beka baten bidez prestakuntza jasotzeko. Mondragon Unibertsitateak Bilbon duen egoitzan, BBF eraikinean (Bizkaiko Berrikuntza Faktoria) eta Donostiako Tabakalera Kultura Garaikidearen Nazioarteko Zentroan jasoko dute prestakuntza hori.

Ikastaroaren ostean, hiru sortzaileko horietako batek telesail digitala grabatzeko aukera izango du. Seriea 2018an ekoitzi eta filmatuko da, ETBn emango da eta nazioarteko hainbat merkatutara bideratuko da VOD plataformei saltzeko, hala nola Netflixi eta HBOri.

Ikus-entzunezkoak eta gazteria

Barlovento Comunicación etxeak eginiko azterlan baten arabera, 2016an, laugarren urtez jarraian, murriztu egin zen Estatuko biztanleek telebistaren aurrean igarotzen duten denbora. Iazko urtarrilean, telebistaren eguneko batez besteko kontsumoa 244 minutukoa zen, eta irailean, 198 minutura murriztu zen zifra hori. 21 eta 36 urte arteko gazteen artean, batez bestekoa baxuagoa da, 157 minutu.

Ikerketa berean egiaztatu da gazteak alde batera uzten ari direla ikus-entzunezko ohiko formatuak, eta nahiago dituztela serie digitalak. Gainera, Estatuko autonomia erkidegoak alderatu ditu ikerketak, eta horren arabera euskal gazteak telebista gutxien ikusten dutenetakoak dira, batez beste 146 minutu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa