Plateruenean egin dute Durangaldeko aurkezpena. Grabazio baten bidez Mixel Berhokoirigoin Bakezalearen berbak eskaini dituzte lehenengo. Bakearen bidea urratsez urrats jorratu behar dela azaldu du eta hurrengo pausua abenduaren 9an Parisera joatea dela. “Hutsik egin ezin den hitzordua da, berriro gertatuko ez dena. Parisetik pasatzen da Euskal Herriko bakebidea. Parisera joan behar dugu borondatez eta fede onez beterik, baina baita determinazioz ere”, adierazi du.
Ondoren, Iñaki Lasagabaster EHUko Administrazio Zuzenbideko katedraduna presoek dituzten giza eskubideen inguruan mintzatu da. Presoen sakabanaketaren, gaixorik daudenen egoeraren eta kartzela zigorren pilaketaren inguruan jardun du giza eskubideen ikuspegitik. “Eskubideak dira, ez politika. Ez gabiltza politika aldaketa bat eskatzen. Nagusiki, aldarrikatzen gabiltzana pertsonen oinarrizko eskubideekiko errespetua da. Eskubide horiek errespetatzen ez diren gizartea ez da demokrazia bat”.
Miren Amurizaren bertsoekin amaitu dute ekitaldia. 'Euskal Herritik abiatuta, geu ere Pariseraino. Ez gara joango bakea ekartzen, bakea egiten baino' abestuz amaitu du bertso bat bertsolari berriztarrak.
Azkenik, Durangaldeko herrietan ekarpen ekonomikoak egiteko zein autobusetan izena emateko aukera egongo dela gogoratu dute.
Iñaki Lasagabaster eta Miren Amuriza gaurko ekitaldian: