Ugartetxea, Amuriza, 'Abarkas' eta Elortza arituko dira Bertsolari Txapelketa Nagusian

Itsaso Esteban 2017ko ira. 12a, 14:22
Gaur aurkeztu dute Txapelketa Nagusia, Bilbon.

Gaur aurkeztu dute Bilbon irailaren 23an hasi eta abenduaren 17ko finalagaz amaituko da Bertsolari Txapelketa Nagusia. 43 parte-hartzaile izango ditu txapelketak, tartean Beñat Ugartetxea, Eneko Abasolo Abarkas, Igor Elortza, eta Miren Amuriza Durangaldeko bertsolariak. Finalerako txartela bazeukan arren, Unai Iturriagak ez du izenik eman. 

18 lagunek osatzen duten txapelketako gai-jartzaile taldean, bestalde, Amaia Ugalde elorriarra eta Maite Berriozabal berriztarra dabiltza.

"Euskararen lurralde osoan", Euskal Herriko zazpi lurraldetan, izango da, lehen aldiz, Bertsolari Txapelketa Nagusia. Iñaki Murua Euskal Herriko Bertsozale Elkarteko lehendakariak gaurko aurkezpenean azpimarratu duenez, txapelketaren saioak Euskal Herri osoan egitea “ez da kontu sinbolikoa, ezta indar erakustaldi bat ere”. Muruak nabarmendu duenez, “errealitate baten isla da”, bertsolaritza "bizirik baitago eremu horretan”.

Baigorrin, Seguran, Leitzan, Zallan, Zumaian, Tolosan, Bastidan, Irunen, Maule-Lextarren, Durangon, Amurrion, Donibane Lohizunen, Iruñean eta Barakaldon izango dira Txapelketa Nagusiko saioak. Finalaurrekoetan sailkatutako zazpi bertsolariak eta Amets Arzallus egungo txapelduna arituko dira abenduaren 17ko Barakaldoko finalean.

Dagoeneko eskuragai daude txapelketako sarrerak www.bertsosarrerak.eus webgunean.

 

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!