12:30ean izango da ekitaldia, Abadiñon, Gerediagako foru zelaian. Teila saria eman aurretik, zenbait bideo proiektatuko dituzte, Zubiaurre anaia margolarien inguruko bat eta Berrizko eta Iurretako dantzekin lotutako bana, hain zuzen.
Bizkaiko dantzak berreskuratzen eta horiei ikusgarritasuna ematen ibili izan da Pertika bilbotarra, Gerediagak dioenez. Tartean, Durangaldeko Dantzari-dantza ikasi, eta Basurtuko Beti Jai Alai taldeagaz munduan zehar zabaldu du.
1997an eman zuen lehenengoz Gerediagak Teila saria. Oraingoz, Gregorio Monreal, Pedro Mari Basañez, Adrian Zelaia, Karmele Goñi, Enrike Ibabe, Jose Angel Barrio Loa, Jose Luis Muñoyerro, Iñaki Garcia Camino eta Juanjo Moreno izan dira sarituak.
Nobedadea, oinez
Durangaldeko historia ezagutzera ematen du Gerediagak Merinalde Egunean. Aurten, nobedade lez, oinezko ibilbide bat prestatu dute, Garaiko San Juan Momoitiotik Abadiñoko Astolaraino, eta 09:00etan hasiko da. Momoition antzinako gizarte egitura aztertuko dute; Garaiko udaletxean elizateen sorreraz jardungo dira; Gerediagako foru zelaian Merinaldeko ordezkarien batzarrak oroituko dituzte; eta Astolan, auzitegia eta kartzela zena bisitatuko dute.