BBK sariketatik kanpo geratu da, puntu erdigatik, Durangaldea

Anboto 2017ko mar. 8a, 13:53

Durangaldeko eta Busturialdeko bertsolariek kantatu dute, gaur, Bizkaiko Bertsolari Gazteen BBK txapelketaren XXV. edizioko lehenengo sailkapen proban. Puntu erdiko aldeagatik, Busturialdeko taldeak irabazi du.

Busturialdeak 371.5 lortu ditu eta 371 Durangaldeak, eta beraz, Busturialdeko taldeak lortu du martxoaren 24an Zallan jokatuko den finalaurrekorako txartela. Durangaldeko seikotea osatu duten Ander Sarriugarte, Eider Gallastegi, Iruri Altzerreka, Xabier Barreña, Peru Astigarraga eta Gorka Pagonabarraga bertsolarientzat, aldiz, gaur amaitu da aurtengo txapelketako ibilbidea.

Datozen asteetan, beste hiru sailkapen proba eta bi finalaurreko jokatuko dituzte Bizkaiko Bertsolari Gazteen BBK txapelketaren finalistak erabakitzeko. Bilboko BBK aretoan jokatuko dute finala, martxoaren 31n.

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!