Idoia Buruaga elorriarrak, David Cobos atxondarrak, Lorea Muñoz izurtzarrak eta Endika Jaio mañariarrak parte hartu dute agerraldian. LOMCEren eraginez, lehen Amankomunazgoak kudeatzen zuen institutua pribatizatzea edo udal batek bere gain hartzea ziren aukerak, eta ardura Durangoko Udalak hartzea erabaki zuten, duela urte eta erdi inguru. Ikastetxearen finantzaziorako, Eusko Jaurlaritzatik jasotzen duten laguntzaz aparte, eskualdeko udalek kuota bat ordaintzea proposatu zuen Durangok. Baina EH Bilduk zerbitzuaren gestioa ere hitzartu gura du. "Kuota batetik aparte, lanketa sakonago bat behar du", esan du Buruagak.
Cobosek azaldu du ikastetxearen kudeaketa "%100 publikoa" izatearen aldekoak direla, eta gogoratu du "ehundaka gazterentzako alternatiba" izan dela urteotan. "Proiektuarekiko konpromisoa eta apustua berresten ditugu", Atxondoko alkatearen esanetan.