Gabonak Durangaldean

Urtea amaitzeko, Santxibiri, San Silbestre lasterketak, eta Belatxikietara igoera

Anboto 2015ko abe. 21a, 10:00
Deskargatu Info Ahotsak :

Iazko Santxibiri lasterketako une bat; euria eta txingorra izan zuten iazko edizioan.

Urtea amaitu aurretik, korrika zein mendiko bizikletan izerdia botatzeko hainbat proba izango dira eskualdean. Elorrion, abenduaren 27an, laugarren aldia egingo du Santxibiri lasterketa herrikoiak. Durango Kirol taldeak Elorrioko Udalagaz batera antolatzen du. Nagusien lasterketa 12:30ean hasiko da, eta aurtengo ibilbideak 5,5 kilometro izango ditu. Aurretik, umeentzako lasterketak antolatuko dituzte. Santxibiri lasterketarako izen-ematea doakoa da kirolprobak.com webgunean.

Zornotzan, Durangon eta Zaldibarren San Silbestre lasterketak egingo dituzte, abenduaren 31n. Durangoko 17:00etan hasiko da, Santa Anan, eta Zaldibarkoa ere ordu berean abiatuko dute. Zornotzakoa 18:00etan, erdigunean hasiko da. Probek bost bat kilometroko ibilbidea izango dute.

Belatxikietara Igoera
Extrem Zornotza taldearen Belatxikietara Igoerak 13. aldia egingo du abenduaren 24an. Belatxikietara joateko hiru modu daude: 09:30ean oinezko ibilbidea hasiko dute, 10:15ean korrikakoa (14 km) eta 10:30ean BTTkoa(10 km). Izen-ematea www.extremzornotza.com-en egin daiteke, hilaren 22ra arte (5 euro). Egunean bertan eginez gero, 15 euro izango da. Prezioan barne daude proban zeharreko elikadura postuak eta hamaiketakoa, besteak beste.

Kirola
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!