Eguenean Extremadurara (Espainia) joan ziren, aire presioak aldeko izango zituztelakoan, eta horrela izan zen. Lehen egunean 135 kilometro egin zituen Uribek, eta Gabiriak 25 bat bakarrik, ez zuelako aire korronterik hartu. Barikuan hegaldi laburrak egin zituzten hirurek. Zapatuan, ordea, espero ez zuten hegaldia irten zitzaien: 200 kilometro egin zituzten hirurek parapentean, Montanchez herritik irten (Caceres, Extremadura) eta Cordobaraino (Espainia): “Itzela izan zen, eta asko gozatu genuen”, adierazi du Gabiriak. Uribek aurten Iparraldeko Ligako lasterketa bat irabazi du: “Denbora gutxian asko hobetu du, eta parapentean etorkizun itzela duela iruditzen zait”.
Pirineoak zeharkatuz
Uztailaren 13tik aurrera, Hondarribian (Gipuzkoa) hasi eta Gironan (Katalunia) amaitzen den Xpyr parapente proban parte hartuko du Iñigo Gabiriak. Bi urterik behin egiten den proba da, eta orain bi urte irabazi egin zuen. Bera izan zen Pirinioak zeharkatu, eta 440 kilometroak osatzen aurreneko parapentezalea. Aurten “ia ezinezko” ikusten du garaipena errepikatzea. “Munduan zehar entzutea irabazi duen lasterketa da, eta munduko onenak etorriko dira”.