Durangaldeko bost horiek eta Bizkaiko beste hamahiru bertsolarik jardungo dute txapelketaren finalaurrekoetan.
Domekan, Zornotzako Zelaieta zentroan jokatu zuten Bizkaiko Bertsolari txapelketako azken kanporaketa saioa, eta finalaurrekoetan ariko diren bertsolarien zerrenda osatua dago.
Guztira, hemezortzi bertsolarik jardungo dute, txapelketaren datozen asteetako saioetan: 2010ean finalista izandakoek, kanporaketan irabazle izan direnek, eta txapelketako saioetan puntuazio altuena lortu duten bostek.
Finalaurrekoetan kantatzeko txartela eskuratu dute Durangaldeko bost bertsolarik ere. Duela bi urteko txapelketan finalista izan ziren Miren Amuriza berriztarra, Beñat Ugartetxea mallabiarra eta Eneko Abasolo ‘Abarkas’ iurretarra, eta zuzenean sartu ziren aurtengo finalaurrekoetan; bestalde, Sopelako kanporaketa saioan lehenengo egin zuen Igor Elortza durangarrak, eta aurrera egitea lortu du Gorka Lazkanok ere.
Abenduaren 15eko Bilboko finalaren aurretik, hiru finalaurreko saio egingo dituzte.
Azaroaren 18ko saioan, Basaurin kantatuko dute Eneko Abasolo ‘Abarkas’-ek eta Gorka Lazkanok . Durangoko Landako erakustazokan jardungo du azaroaren 25ean Igor Elortzak, eta abenduaren 20ko azken finalaurrekoan ariko da Miren Amuriza, Gernikako frontoian.