Digitalago eta biziago dator Ttap berritua , Monika Belastegi zuzendariak azaldutako moduan: “Interaktibitate-maila eta dinamikotasuna nabarmen areagotu dira. Bisualagoa ere bada; irudiek, esaterako, pantailaren azalera osoa hartzen dute. Aipagarria da, bestalde, erabiltzaileari irakurketa errazteko letra-neurria ere nabarmen handitu dela”. Zuzendariak azaldu duenez, duela lau urte aldizkaria sortu zen une beretik, baimena eman diote euren buruari esperimentatzeko eta berritzeko , eta hortxe kokatu du oraingo berritzea ere: “Ttap aldizkari bizia da eta egungo gizartea bezala aldatzen eta eboluzionatzen doa; horren emaitza hauxe da, eduki berria, diseinu berria, freskoa eta gaurkotua . Edonoren eskura eta askatasunez partekatzeko eta zabaltzeko gertu dagoen edukia, alegia”.
Edukia ere, berria
Forman ez ezik, edukian ere aldaketak izan ditu. Aldizkariaren atal nagusiak egokitu egin dituzte, eta berriak sortu . Elkarrizketa nagusia da egokitu den ataletako bat: Deabruaren galderak izeneko galdera-erantzun laburren ikus-entzunezko atala gehitu zaio, eta, elkarrizketatua musikaria den kasuetan, kantu bat ere abestuko du Ttap -eko erabiltzaileentzat. Elkarrizketekin tartekatuz erreportajeak izango dira aldizkariaren beste atal nagusietako bat, eta jorratuko diren gaiak askotarikoak izango dira. Eta, besteak beste, iritzien atala, argazkilarien txokoa eta zinema gomendioak mantendu egingo dira, diseinu berrira ekarrita.
Atal berriak ere estreinatuko ditu Ttap berrituak . Moda atalak, esaterako, orain arte baino leku nabarmenagoa izango du: batetik, zero kilometro kontzeptua aintzat hartuta, Euskal Herriko diseinatzaileen, sortzaileen eta modaren alorrean jarduten duten euskal artisten erakusleiho izango da, bertako artisauen eta sortzaileen lanari balioa emanda. Bestetik, Estiloz atalak unean uneko joerei eutsiko die kolaboratzaile adituen eskutik.
Epa, Opi! atalean, bestalde, esparru askotariko aurpegi eta izen ezagunei egindako elkarrizketa labur eta freskoan euren azken berriak jasotzeaz gain, kuttunen dituzten bost lekuak kokatuko dituzte Euskal Herriko mapa interaktiboan. Gaurkotasunak ere izango du lekua, Asteko behatxulotik eta Iritzia ataletan, eta Museoetako musak atalak Euskal Herriko museoetako ateak irekiko dizkio erabiltzaileari.
Orain artekoari jarraikiz, kolaboratzaile komunitate sendoari eutsiko dio Ttap aldizkariak; arlo askotan diharduten kolaboratzaile zerrenda zabal hori osatzen dute, besteak beste, hauek: Arantxa Urretabizkaia, June Fernandez, Ander Izagirre, Oier Zuñiga, Amaia Uribe, Irati Agirreazkuenaga, Paul Caballero, Exprai, Aritz Gordo, Ane Irazabal, Olaia Beloki, Abraham de Amezaga…
Webgune osatuagoa, lagungarri
Webgunea ere, ttap.eus, gaurkotu eta edukiz jantzi dute. “Ttap aldizkariaren aperitiboa izateko helburua du atariak. Aldizkari digitalaren lagungarri izango da edukia partekatzeko eta zabaltzeko orduan”, nabarmendu du Monika Belastegi zuzendariak. Eskuko telefonoetarako Ttap aldizkaria 2018an abiatu zuen Aldizkari Digital Multimediak SL enpresak, honako bazkide hauekin: Durangaldeko Anboto, Goiena, Zumaiako Baleike, Iruñerriko Euskalerria Irratia, euskarazko tokiko hedabideak batzen dituen Tokikom bateragunea eta Kataluniako Esguard aldizkaria. 2020ko abendua ezkero, Goiena Komunikazio Taldeak kudeatzen du erabat. Irailaren 30etik aurrera ez galdu astero-astero Ttap aldizkariaz gozatzeko aukera. Android zein iOS sistema eragilea duten gailuetatik eskuratu daiteke, doako Ttap aplikazioa deskargatuta.
Informazio gehiago: ttap.eus