Zabala izango da Durangaldearen ordezkaritza txapelketan: eskualdeko 40 bat bertsozale arituko dira, bost taldetan. Durangon Bratva taldea sortu dute, Eta abarrak... Zornotzan, Koipelustre’s Abadiñon, Iurretan ere osatu dute txapelketan parte hartzeko taldea, eta Tire! taldea eratu dute Berrizko eta Garaiko hainbat bertsozalek.
2015ean txapelketaren inguruan abiaturiko gogoetatik eratorritako ekimena da Bizkaiko taldekako bertsolaritza txapelketa hau. “Oinarrian eragin” gura du Bizkaiko Bertsozale elkarteak ekimen honegaz, “bertso eskolak eta eskualdeen arteko harremanak indartu”. Antolatzaile, epaile eta gai-jartzaile berrien parte hartzea bultzatzeaz gain, “bertsolari hasi berriei plazarako bidea erraztea” gure diete, “eta arrazoi desberdinengatik ohiko txapelketan parte hartzeko motibaziorik ez dutenei aukera bat eskaini”.