Txapelketetan, puntuazioaren zain egoteko unea heltzen denean, normalean gutxi gorabehera bakoitzak bere faboritoa izaten du. Bertsolari batek ale oso onak bota dituelako, besteak barre-algara asko eragin dituelako... Kinielatxoa egiten joaten da entzulea. Bada, zapatu honetan, Etxebarrin, ez da erraza izan kinielak egitea. Bertsolariek nahiko saio orekatua egin dutela esan daiteke, oreka desorekatuaz berba egin daiteke beharbada. Egon dira aleak, baina distira askorik ez. Eta amaieran, Durangalderako bereziki, sorpesa tristea; Miren Amurizak seigarren eginda "Agur Bizkaia eta/ agur Etxebarri" kantatu zuen azken agurrean. Erantzuna, txalo zaparrada handia. Eneko Abasolo 'Abarkas', laugarren geratu da, eta finala urrun xamar dauka honek ere.
Ofizioetan nahiko lan erregularra egin zuten Amurizak eta Abarkasek. Zortziko txikian, esaterako, Amuriza bale bat gertutik ikustera joan zen txalupan Ander Elortegigaz. Elortegik arpoia atera eta balea afaltzeko intentzioa zeukan, eta Amurizak ondo erantzun zion horrelako ideiak burutik kentzeko: "balea hurbildu eta / biok gaitu blaitu / zu halan be oilarran / pare jarri zaitu / gaur afari ederra / diozu baina aitu / ni konforme berak gu /jaten ez bagaitu".
'Abarkas'ek hamarreko txikian Joseba Artzagaz kantatu zuen. Biak lo arazoekin, loa ikertzeko esperimentu baten parte hartzen zebiltzan. "ni izan nintzen mediku / batzuen bezero / hamar pastilla hartzen / nituen gauero / eta lo hartzen nuen / gaba joanda gero" lako ideiak bota zituen.
Kartzelan, dimisioa
"Dimititu egin duzu" izan zen Etxebarrian kartzelako gaia. Amurizak Gallardonen paperean kantatzea aukeratu zuen, abortoaren lege proposamenak porrot egin eta gero dimitituz. Ausarta izan zen aukeraketa, baina postura horretan guztiz eroso ez zen ibili berriztarra. Aipatzekoa da Maná talde mexikarraren Se me olvidó otra vez kantuaren moldaketa egin duela Amurizak, eta harekin kanatatu zuela.
'Abarkas' alkatearen paperetik ibili zen kantuan. Erraustegiaren auziarekin herrian hainbat burukomin eta borroka zituela azaldu zuen: "holakoetan sentitu nahi du herri xumearen parte". "ta dimititu egin behar dut / nago arazoez lepo / ea atzetik datorren horrek / egin dezaken hobeto" esanaz amaitu zuen.
Puntuazio orokorra:
Iratxe Ibarra: 475,5
Fredi Paia: 475,5
Joseba Artza: 469
Eneko Abasolo 'Abarkas': 469
Ander Elortegi: 467
Miren Amuriza: 464
Informazio gehiago, txapelketako webgunean.