Domekan Elorriotik sartu zen Korrika Durangaldean, eta ordu erdi inguruko atzerapenarekin zeharkatu zituen herriak. Ez da izango baina eskualdean izango dugun aldi bakarra, izan ere martitzenean Zornotza eta Otxandion izango da Korrika.
Umeak, helduak eta baita adinean aurreran doazenak batu ziren domeka goizean Korrikarekin bategiteko eskualdean. Bakoitzak bere neurrian; batzuek kilometroak egin zituzten aineketan, beste batzuek aldamenetik animoak ematen zituzten, eta denek euskararekiko konpromezua agertu zuten. Jairako egun polita izan zen eskualdeko herrietan domekakoa.
Ordu bete gutxiago lo eginda egon arren, Durangaldeko
korrikalariek oso ondo erantzun zuten. Elorrion hasi eta Durangon amaitu
duenik ere izan zen. Atxondon tarte laburra izan bazuten ere, zazpi
taldek eraman zuten testigua. Durangon, jendetza handia batu zen, eta
lekuko eramaileen artean, Ahaztuak taldea aipatu behar da. Testigua
alde zaharrera eraman zuen, datorren zapatuan 70 urte beteko dituen
bonbardaketak gehien astindu zuen lekura. Durangon datorren asteburuan
hainbat ekitaldi egongo dira urtemuga horren harira.
Hainbat emakumeri euskararen alde egindako lana eskertu zitzaien
Durangaldean. Horietako bat da Nieves Aranoa, AEK-ko irakaslea
sorreratik. Aurten, lehenengo aldiz eraman zuen lekukoa. Durangoko
Kurutziaga ikastolan hasieratik dabiltzan Mila eta Lurdesek ere
euskararen lekukoa eraman zuten domekan.
Iurretan, enpresek erosi ohi dituzte kilometroak, eta aurten oso
tarte handian pasatu ez denez, arineketan eurek egin ordez, kilometroak
herrian banatzea erabaki zuten. Korrika batzordeak emakumeei eman nahi
izan zien korrika egiteko aukera, eta tarte batean hala egin zuten.
Kandida Zamalloa 92 urteko emakumeak eraman zuen lekukoa, baita Maritxu
Ugartek ere. Maritxu Ugarte AEK-ko irakaslea izandakoa da, eta Iurretan
Korrika antolatzen hainbat urte eman ditu: bigarren edo hirugarren
ediziotik hamaikagarrenera arte.
Korrikaren webgunea
Asteburuan zehar Korrikaren webgunea (www.korrika.org) itxita egon da. AEK-k bere orrian azaldu duenez, bariku goizean, Korrikaren bigarren egunarekin batera, Korrikaren gunean egon zen sarrera piloaren ondorioz, web orria bertan behera
geratu zen. Arazoa astelehenean konpontzea espero dute.
"Sentimendu ezberdinak eragin dizkigu
AEK-ko kideoi kontu honek. Alde batetik, amorrua ematen digu orri hori
martxan ez egoteak, baina, beste alde batetik, zergatik gertatu den
gogoratuta, sekulako poza sentitzen dugu!".