Bizkaiko Bertsozale Elkarteak bertsolaritzaren transmisioan egiten den beharrari egin gura izan dio gorazarrea. 2004an hasi zen Arantza Plaza Zamora (Gizaburuaga, Bizkaia, 1958) eskoletan bertsolaritza irakasten, eta behar horretan aritu da 2022ra arte. Bizkaiko elkartean laneko erretiroa hartu duen lehenengo langilea izan da Plaza. Bi hamarkadatan, hainbat errealitate ezagutu dituela nabarmendu dute Bertsozale elkartetik. "Egoera soziolinguistiko desberdinak, eskola handi zein txkiak, hiriburua eta herriak... Kasu guztietan ederto moldatu da". Hezkuntza arautuan ez ezik, elkarteko beste hainbat proiektutan ere parte hartu duela azpimarratu dute. "Bizkaiko bertsolaritza lantzeko eta elikatzeko dokumentazio beharretan ibili da hamaika elkarrizketa eginez, tartean, Bizkaiko Bertsogintza IV liburuko dokumentazio beharretan".
Bizkaiko Bertsolari Txapelketa ere gertutik bizi izan du Plazak; boluntario beharrak egin ditu, eta etxekoak eta lankideak ere izan ditu oholtza gainean.