Brasilen kontra 67. minutuan zelairatu zinen. Zelan gogoratzen dituzu jokaturiko une horiek?
Bagenekien partidu gogorra izango zena, brasildarrak jokalari handiak direlako. Partidua ondo hasi nuela esango nuke, urduri nengoen arren. Familia ere partidua ikustera etorri zen. Izan ere, aitaren senitartekoak Torreviejan bizi dira. Zelaia ezagutzen nuen, joan zen udan hantxe entrenatu nintzen eta. Egia esanda, txikitatik Torreviejan igaro ditut udak.
Europako txapelketa hasita dago. Zer helburu duzue?
Helburua irabaztea da. Espainiako selekzioak askotan irabazi du Europako Kopa. Kontuan hartu behar da Espainia ez dagoela Sei Nazioetan edo antzerako batean, txapelketa pribatuak direlako, eta gainerako taldeen oso gainetik dago. Une honetan Herbehereak dira aurkari nagusia, azken urteetan gorakada handia izan duen selekzioa. Guretzat garrantzitsua da partidu bakoitzean dena ematea, munduko txapelketarako prestakuntza lez.
Munduko txapelketan zein izango da helburua?
Zeelanda Berria, Irlanda eta Japonia daude gure multzoan. Talde indartsuak dira, profesionalak. Helburua ahalik eta lanik onena egitea izango da, eta, zergaitik ez, talderen bati irabaztea.
Orain urte bi, Eibar Rugby Taldetik Lyongo Lou taldera batu zinen. Zelan sortu zitzaizun aukera?
Selekzioko taldekide batek esan zidan Frantziako talde bat nire postuko jokalari bila zebilela. Eurekin berba egin nuen, proposamen erakargarria iruditu zitzaidan eta harantz joan nintzen. Azkenean, Batxilergoa amaitzear nengoen eta ez neukan garbi ikasketetan zer bide hartu. 18 urte egin berritan, tren hori hartu beharra neukala sentitu nuen, esperientzia bizitzeko eta profesional legez jokatzeko. Gurasoen babesa izan nuen eta joatera animatu ninduten.
Ez zen talde aldaketa bakarrik, baita bizimodu aldaketa ere.
Bai, aldaketa handia izan zen. Erabakia hartu nuenean banekien gauzak aldatuko zirena. Baina ez nintzen kontziente zein punturaino aldatuko zitzaidan bizimodua eta zein punturaino aldaraziko ninduen ni neu. 18 urtegaz, bizimodu eroso batetik irten eta bakarrik bizitzera pasatu nintzen. Beste herrialde bat, beste kultura bat..., frantsesik jakin barik, gainera. Errealitate dosi latza izan zen. Baina, aldi berean, esperientzia hau ondo etorri zait. Denbora honetan pertsona legez asko hazi naizela sentitzen dut. Badakit edozein egoerari aurre egiteko kapaz naizena.
Eta jokalari legez zelan aldatu zara?
Arlo honetan ere aldaketa ikaragarria izan da. Jokalari handiagoak dira hangoak, eta jokoa bera askoz ere arinagoa da. Dena da handiagoa eta azkarragoa. Hasierako entrenamenduetan taldekideek magia egiten zutela sentitzen nuen. Horrelakorik ikusi bakoa nintzen. Horrek jokalari legez hobetzera eraman ninduen. Han, errugbia hemengo futbolaren parekoa da. Lehiakortasun handiagoa dago. Lyonek futbol talde indartsua du, Olympique Lyonnais, baina, hala ere, emakume asko dabil errugbian.
Atera daiteke bizimodua emakumeen errugbiko lehen mailan jokatuta?
Emakume gutxi bizi da errugbitik. Selekzioagaz dabiltzanak, esaterako. Errugbia beste lan batzuekin bateratzea da normalena. Nire taldekide guztiak ikasten edo beste lan batean dabiltza. Gure denborarik gehiena errugbiari eskaintzen diogula eta hortik diru apur bat datorkigula, horixe esan gura du 'profesional' izateak guretzat. Beste era bateko gauzak ere jasotzen ditugu: gimnasio onak, entrenatzaile onak… Eta bizitzako esperientzia.
Hizkuntzaren traba gaindituta dago?
Bai, gaindituta dago. Hasieran txarto pasatu nuen, lotsa handia ematen zidan. Baina orain oso ondo moldatzen naiz frantsesez. Azterketa baterako prestatzen nabil.
Taldekideen artean, Frantziatik kanpoko jokalari asko dago?
Espainiako, Suitzako eta Italiako jokalariak daude. Beraz, kanpokoa ere badago, baina ez da Espainian bezain ohikoa. Frantzian fitxaketa gutxiago behar dute, jokalari asko dago eta.
Zelan doa ligako denboraldia?
Ez gabiltza gura genukeen bezain ondo. Hamar taldetik zazpigarren goaz. Aurten talde bakarra jaitsiko da, eta, alde horretatik, ez dugu arriskurik. Hiru partidu geratzen dira eta ea seigarren postura igotzen garen.
Denboraldi hasieran gorago ibiltzea zen helburua?
Bai, espektatiba handia geneukan, iazko denboraldia oso ona izan zelako. Ligako final-laurdenak jokatu genituen. Taldea hain gora heltzen zen lehenengo aldia zen. Aurten aldaketa asko egin da, eta, egia esanda, kostatu egin zaigu egoerara egokitzea.