Atzo, astelehena, 19:30ean, Ertzaintza Berrizera joan zen, bertako etxe batean lapurreta egiten ari ziren abisua jaso ondoren. Agenteak eraikineko portalean sartu ziren eta bi gizon aurkitu zituzten bertan. Bi gizonek ezin izan zuten azaldu zertan zebiltzan han, eta identifikatu ondoren miatu egin zituzten.
Bi gizon horiei diru-zorro bat aurkitu zieten eta diru-zorroaren barruan bitxiak, aparatu elektronikoak, erloju bat eta dirua zituzten; bai eta gakorde batzuk eta bumping bidez sarrailak behartzeko giltza eraldatu bat ere, Ertzaintzak ohar batean azaldu duenez. Agenteek, eraikina miatu zutenean, etxe bateko atea behartuta zegoela ikusi zuten, eta trastelekuen eremuan adierazitako etxeko hainbat gauza aurkitu zituzten.
Horren aurrean, agenteek bi pertsona horiek atxilotu zituzten indarra erabiliz lapurreta egitea leporatuta. Atxilotuak Durangoko Ertzain-etxera eraman zituzten zegozkion eginbideak hasteko.