Erasoak salatu eta gaztetxeak eta gune autogestionatuak babesteko elkarretaratzea egin dute iluntzean Berrizen. "Gune hauen babesa herritar guztion erantzukizuna da. Gaztetxearen kontrako erasoek ez ditu bakarrik bertan ari garen lagunak kaltetzen. Erasoek Berrizko herria ere kaltetzen dute, 24 urtean kultura sortu eta hedatzeko paper garrantzitsua bete baitu gure herriko gaztetxeak", azaldu dute asanbladako kideek.
Azken asteetan Euskal Herriko eta Durangaldeko hainbat gaztetxeren aurkako erasoak eta lapurreta saiakerak salatu dituzte. Berrizko Hiltegixe gaztetxeaz gainera, Zaldibarko eta Elorrioko gaztetxeek ere salatu dituzte horrelakoak. Eibarko eta Larrabetzuko gaztetxeetan ere sartu dira lapurretan azken asteetan.
Elkarretaratzeak iraun bitartean eskuorriak banatu dituzte asanbladako kideek.