BMEk kanpaina berri bat kaleratu berri du, eta hainbat sari banatuko dituzte herriko komertzioetan, 10 eurotik gorako erosketak egiten dituzten herritarren artean. "Errifak atera ditugu, eta abendura bitartean BMEko komertzioetan 10 euro baino gehiagoko erosketak egiten dituztenei errifak banatuko dizkiegu", azaldu du BMEko kideak. Elkarteko kideek azaldu dutenez, errifak Berrizko Merkatari Elkarteko kide diren komertzioetan baino ez dituzte banatuko.
Sariei dagokienez, hainbat saridun egongo dira. Lehenengo saria BH bizikleta elektrikoa eta ekipamendua dira, bigarrena ordenagailu eramangarria, hirugarrena LG smart telebista eta laugarrena 500 euroko balioa duen otzara bat. Azkenik, 300 euroko bost otzara ere zozkatuko dituzte.
Batzeko deia merkatariei
Bestalde, merkatari elkarteko kideek elkartera batzeko deia egin diete Berrizko gainerako komertzio eta tabernetako kideei. "Oraindino elkartean ez dauden komertzioei batzeko deia egiten diegu; gure ustez, bertako kide izateak hainbat onura ekartzen ditu eta", azaldu dute elkarteko kideek. Gainera, euren ustez, zenbat eta komertzio gehiago izan "orduan eta indar handiagoa" izango du Merkatari Elkarteak.