Behin mapa esku artean izanda, Berrizko Udalaren asmoa ekintza plan bat jorratu eta kutsadura puntuak hobetzen joatea dela esan zuen alkateak.
Josu Albizuri EH Bilduren bozeramaileak adierazi zuen eurak "beti" egon direla zarata maparen alde. "Hala ere, gure ustez, zarata mapa hau zaharkituta jaio da. Ez dira kontuan hartu Learreta eta Abeletxeko lanak, eta lan horiek jasota egon beharko liratekeela deritzogu. Beraz, hasi orduko berriztu egin behar den zarata mapa bat daukagu", kritikatu zuen Albizurik.
EH Bilduko zinegotziari erantzunez, Isoirdek "mapa bizia" dela eta kale neurketen bitartez mapa eguneratzen joango direla azaldu zuen.
Lehenengo neurria, hartuta
Berrizko Udalak neurriak hartuko ditu kutsadura akustiko hori gutxitzeko. Alkateak kazetariei jakitera eman zienez, dagoeneko hartu dute lehenengo neurria. "A8an kutsadura akustiko handia dago eta errepide ondoan dauden panelak aldatzeko eskatu genion Bizkaiko Foru Aldundiari", adierazi zuen Isoirdek. Aldundiak 850.000 euro inbertitu ditu lan horiek egiteko.
Neurri hau Berrizko Udalak hartzen duen lehenengoa dela esan zuen alkateak.