Etxeko taldea Grises taldeagaz batera arituko da, urtarrilaren 19an, Kultur Etxean, 21:30ean. "Grises oso talde ezaguna da. Gainera, gure lagunak dira eta asko gustatzen zaizkigu. Eurek ere kontzertu polita eskainiko dute", jarraitu du Elortzak. Maiatzaz geroztik, Seiurte taldeko kideek ez dute kontzerturik jo eta gogotsu daude instrumentuak berriro ere astintzeko. "Denboratxoa da ez dugula kontzerturik ematen. Orain arte, material berria sortzen egon gara. Hala ere, aukera hau suertatu zitzaigun eta ezin izan dugu ezetzik esan", esan du musikariak. Gainera, "pilak kargatzeko" aitzakia aproposa dela jakinarazi du.
Kontzertuak Gaztetxean
Hiltegixe Gaztetxeko kideek ere egitarau zabala antolatu dute San Antonio jaien harira. Barikuan, urtarrilaren 18an, bertso eskolak girotuta pintxopotea egongo da eta, horren ostean, Saia Goait, Kuartz eta DJ Amamaren kontzertuak egongo dira. Zapatuan, Kohatu, The Van eta DJ Ainhoa arituko dira.