Mikel Urrikoetxeak Alvaro Untoriagaz jokatuko du domeka honetan Irribarria eta Merino II.aren kontrako partidua. Asegarcek Ibai Zabalaren ordez Untoria sartzea erabaki du, www.asegarce.com webguneko karteldegian agertzen denez.
Berriztarrak Andoni Aretxabaleta ordeztu zuen, markinarra lesionatu zenean. Aretxabaleta ere Ladis Galarzaren ordezko lanak egiten zebilen. Zabalak partidu bi jokatu ditu. Lehenengoan Urrutikoetxea eta biek 22-17 irabazi zuten Bengoetxea VI.aren eta Larunberen kontra. Joan zen asteburuko bigarrenean galtzea egokitu zitzaien: 14-22 Olaizola II.aren eta Imazen aurka.
Zabalak zapatu honetan jokatuko du berriro. Gorka Esteban aurrelaria eta biak Victor Estebanen eta Ladis Galarzaren kontra ariko dira Iruñeako Labrit pilotalekuan.