14 eta 18 urte bitarteko 40 gaztek parte hartu dute aurtengo eskolarteko bat-bateko sariketa horretan, horietatik zortzik kantatu zuten atzoko finalean. Bat-bateko finala ezezik, eskolarteko idatzizkoa eta taldekakoa ere jokatu zituzten herenegun Markinan. Bizkaia osoko 200 gazte inguru batu ziren idatzizko finalean, eta DBHko lehengo mailakoen artean Araitz Katarain mallabitarra izan zen garailea.
Bizkaiko bertsolaritzaren egun osoko jaia izan zen Markinan zapatuan ospatu zutena, eta helduen txanda izan zen arratsaldean. Taldekako finala jokatu zuten Iurretako Bertso Taldeak, Abadiñoko Koipelustre's taldeak eta Markinako Akerbeltzen Antxumak taldekoek. Azken horiek irabazi zuten euren herrian jokaturiko finala.
