Berriz Bizikletari Elkarteak eta Berrizko Udalak askotariko babesle eta boluntarioen laguntzagaz antolatzen dute martxa. Bizkaiko federazioaren egutegiaren barruan dago, eta ez da lehiakorra, baina amateur zein goi mailako kirolarientzat hitzordu aproposa dela uste dute antolatzaileek. Irati Extreme, Quebrantahuesos zein Iraupen Luzeko BIBE TransBizkaia eta halako probak prestatzeko entrenamendu aproposa izan daiteke, besteak beste, 2.000 metroko desnibel positiboa duelako. Amateurrek, aldiz, martxa lasai hartu eta ibilbideak gordetzen dituen paisaia ederrak gozatu ditzakete.
Irteera neutralizatua 09:00etan egingo dute, Berrizko udaletxetik; amaiera ere toki berean izango da. Irteera ofiziala Muniketa magalean emango dute. Ibilbidean zehar hornidura puntu bi egongo dira: Ispasterren (60. km) eta Ixuan (100. km). Amaieran, dutxa zerbitzua eta ogitartekoak egongo dira parte-hartzaileentzat.
Aurretik izena eman ez dutenek egunean bertan emateko aukera izango dute.