Bederatzi jardunaldi joan dira, ligako herena, eta berriztarrak sendo ageri dira. Etxetik kanpora jokatutako lau partiduak irabazi dituzte. Bihar, Tolosako Laskorain bisitatuko dute, bolada on horri eusteko esperantzagaz.
Elorrioko Buskantza sailkapenaren erdian dago. Presion Break ez bezala, etxetik kanpora kosta egiten zaio puntuak batzea. Asteburuan, sailkapeneko hirugarren dagoen Gallartako Meatzari Petronorren kantxan jokatuko dute.
Sasikoa Durango, eskualdeko hirugarren ordezkaria, larri dabil. Azken-aurreko tokian dago, eta partidu bakarra irabazi du orain arte. Domekan, 12:00etan, mailari eusteko borrokan arerio zuzena duen Ostadar taldea dator Durangora.