Maite Berriozabal berriztarrak emandako gaiei erantzungo diete lau bertsolariek. Umorea, jolasa, generoari buruzko gogoetak, emakumeen arteko konplizitatea, musika eta bertsoa uztartuko dituzte saioan.
Ikuskizunaren sortzaileek ekimenaren izenburuagaz ere adierazten dutenez, azken urteetan bertsolaritzan emakumeak espazio handia irabazi duen arren, oraindik ere, zoritxarrez, ez da kasualitatea bertso saio baten kartelean emakumeen izenak bakarrik agertzea.
Sortzaileen nahia, berandu gabe, emakumeak bakarrik kantari diharduten saioak, berez, urteko edozein egunetan eta pentsatu gabe antolatzea litzateke. Bitartean intentzio osoz eta argiz dihardute.