Ekimenik gehienak bihar izango dira, eta horixe da aurtengo nobedadeetariko bat. Egun nagusia zapatutik barikura aurreratu dute, barikuetan herrigunean egoten den giroa aprobetxatzeko. Lehenengo, 16:30ean, umeen pilota partiduak eta pilota goxua txapelketakoak ikusteko aukera egongo da Apatako pilotalekuan. Segidan, 18:30ean, Hodei magoak familia ikuskizuna egingo du eskolako gimnasioan. Handik kalera aterako dute jaia gero; 19:30ean, DJ Tracken musikak lagunduta, kalejiran irtengo dira herriko kaleetan zehar. Amaitzeko, nork bere janaria eramanda, denek elkarregaz afalduko dute pilotalekuan.
Goitibeherak
Zapaturako ekimen berezi bat antolatu dute umeentzat, Aldatsa elkartearen laguntzagaz: goitibehera jaitsiera. 11:30ean izango da, eta pump track gunearen ondoko errepidean prestatu dute zirkuitua.