Sorginen Lasterketak eta Anboto Kilometro Bertikalak indarrak batu dituzte Atxondoko I. Mendi Asteburua antolatzeko. Urriaren 3tik 5era izango da, Atxondoko Udalaren laguntzarekin.
Aurten lehenengo bider Anboto Kilometro Bertikala eta Sorginen Lasterketa asteburu berean bateratu dituzte, elkarlanari indarra emanda. Lehenengoa, urriaren 4an izango da, eta bigarrena, urriaren 5ean. Baina ez dira horrekin konformatu eta egitaraua bestelako ekitaldiekin osatu dute. Esaterako, urriaren 3an hitzaldi bi izango dira Apatako eskolan: Nutrizioaren ingurukoa Garazi Abasolorekin eta kirol-psikologiaren gainekoa Itsasne Blancorekin. Hurrengo egunean Mattin Iñiguez parapentelariaren film laburra ikusteko aukera egongo da toki berean.
Furgoneten eta autokarabanen espazioa
Asteburu osoan zehar furgonetentzako eta autokarabanentzako espazio bat egokituko dute Martzaa auzoko lautadan, kanpotik datorren jendeak asteburua pasatzeko aukera izan dezan. Eta lasterketa egunetan doako garraio zerbitzua eskainiko dute gune horretatik Arrazolara edo Axpera korrikalari eta ikusleentzat, antolatzaileek eta udalak ohar batean azaldu dutenez.
Eguenean izen-ematea atxondarrentzat
Proba bata zein bestea entzutetsuak dira mendi lasterketen munduan eta izen-emateak arin agortzen dira. Horrenbestez, atxondarren parte hartzea sustatzeko, honako erabakia hartu dute antolatzaileek: ostegun honetan, apirilak 3, atxondarrentzat bakarrik zabalduko dute izen-ematea. Kronoak.com atarian egin ahalko da, 08:00etatik 22:00etara.
Hurrengo egunean, apirilaren 4ko ostiralean, korrikalari guztiarentzat zabalduko dute izen-ematea.
URRIAK 3, BARIKUA
- 18:30-20:30 Dortsal banaketa Apatako eskolan (Anboto Kilometro Bertikala eta Sorginen Lasterketa)
- 18:30 Solasaldia Garazi Abasolorekin (nutrizionista eta mendi korrikalaria) Apatako eskolan.
- 19:30 Solasaldia Itsasne Blancorekin (kirol psikologoa) Apatako eskolan.
URRIAK 4, ZAPATUA
- 08:00-10:00 Doako garraio zerbitzua eskainiko da autokarabana eta furgonetentzako gunetik Arrazolara korrikalari eta ikusleentzat.
- 08:30 Anboto Kilometro Bertikaleko banaketa Arrazolan.
- 10:00 Lasterketaren hasiera.
- 14:00 Sari banaketa.
- 14:30-15:30 Doako garraio zerbitzua eskainiko da Arrazolatik autokarabana gunera korrikalari eta ikusleentzat.
- 18:00-19:30 Sorginen Lasterketako dortsal banaketa Apatako eskolan.
- 18:30 Mattin Iñiguez parapentelariaren film laburra Apatako eskolan. X-Alps parapente lehiaketan grabatutako film laburraren aurkezpena.
URRIAK 5, DOMEKA
- 07:00-08:45 Doako garraio zerbitzua eskainiko da autokarabana eta furgonetentzako gunetik Axpera korrikalari eta ikusleentzat.
- 07:30-08:40 Sorginen Lasterketako dortsal banaketa Axpen.
- 09:00 Ibilbide luzeko lasterketaren hasiera.
- 09:30 Ibilbide laburreko lasterketaren hasiera.
- 13:30 Sari banaketa.
- 13:45-14:30 Doako garraio zerbitzua eskainiko da Axpetik autokarabana gunera.
- 14:30 Bazkaria Eusko Label produktuekin bi lasterketetako korrikalarientzat, euren lagunentzat eta lasterketa bietako bolondresentzat Axpeko frontoian. Korrikalariek eta euren lagunek izen-ematea egiteko momentuan izango dute bazkarirako eskaera egiteko aukera.