Mendizaletasuna bultzatzeko helburuagaz, Atxondoko Asuntze mendi taldeak ekimen berri bat hasiko du: Mendi Erronka. Nork bere kontura, lagunekin eta familian egiteko moduko lau irteera proposatu dituzte, epe jakin baten barruan egin beharrekoak. Erronkan parte hartu gura dutenek asuntzemk@hotmail.com helbide elektronikora bidali beharko dituzte proposaturiko toki eta tontorretan egindako argazkiak. Argazkietan agertzen direnen izen-abizenak idatzi behar ditute. Lau erronkak betetzen dituztenekin, sari banaketa eta bidalitako argazkien bideo proiekzioa egingo dituzte aurtengo azaroan, mendi taldekoek jakinarazi dutenez.
Ekimena Atxondo inguruko mendiak eta toki esanguratsuak ezagutarazteko baliatuko dute. Horrela, proposaturiko irteera guztiak herri inguruan dira. Martxoaren 1etik apirilaren 1era, irteera kurioso bat proposatu dute. Atxondon, 'Valle Achondo' izena idatzita duen pago bat dago. Berezitasuna honako hau da: Atxondo herri lez sortu aurretik idatzitakoa dela, 1940ko hamarkadaren amaiera aldera. Maiatz-ekainerako Memaiara irteera proposatu dute; uztail-abuztuan Larranora, eta irail-urrian Tellamendira.
Irteerak Asuntzegaz
Ibilbideak Asuntzegaz taldean egiteko aukera ere badago. Martxoan, Iñigo Mendibilegaz herria ezagutzeko aukera egongo da eta aipaturiko pagora joango dira. Ekainean, Axpeko eta Apatako jaietako mendi martxa egingo dute Memaiara, eta irailean Tellamendira joango dira, Besaideko Oroimen Egunaren barruan.
|
Erronkaren egutegia Nork bere kontura egiteko Maiatzak 1-ekainak 30 Uztailak 1-abuztuak 31 Irailak 1-urriak 31 Asuntzegaz batera egiteko Ekainak 22 Uztailak 5-6 Irailak 21 |