Atxondok txirrindularitza txapelketa berri bat estreinatuko du domeka honetan. Udalerriko eta inguruetako errepideetan Emakumeen Saria jokatuko da lehenengo aldiz. 20 taldetan banatutako 100 bat ziklista lehiatuko dira, eta proba horietatik garaile irteten dutenek Euskadiko txapela irabaziko dute.
Jardunaldiak atal bi izango ditu. 9:30etatik aurrera, kadeteak lehiatuko dira. Txirrindulariek bi bider igaro beharko dituzte Miotako eta Axpeko gainak, guztira, 50 kilometroko ibilbidea osatzeko. 11:30etan, berriz, Junior, Elite eta 23 urtetik beherakoen txanda izango da. Honako hauen ibilbidea ere berdina izango da, baina bi bider barik, hiru aldiz igo beharko dituzte Miota eta Axpe. 75 kilometro, beraz. Proba biak Apatamonasterion hasi eta amaituko dira.
Txapelketaren antolatzailea Eneicat txirrindularitza taldea da. Emakume txirrindularientzako Euskadiko txapelketa bertan behera geratzeko arriskuan zegoela eta hartu dute txapelketa Atxondon antolatzeko ardura. "Ezin genuen Euskadiko txapelketa jausten utzi", esan dute antolatzaileek. Probako laguntzaileen artean, Euskadiko Txirrindularitza Federazioa, BIzkaiko Foru Aldundia, Atxondoko Udala, Abadiñoko Udala eta Iurretako Udala daude.