“Animalienganako tratu txar baten aurrean gaude. Animaliak ezin dira giltzapetuta eduki; beraien beharrak dituzte”, esan dute Durandogekoek. “Ertzaintzak jakitera eman zigunez, txakurrek txipa dute eta paper guztiak dituzte; beraz, beraiek ezin dezakete ezer egin”, esan dute mugimenduko kideek.
Ertzaintzak egoera ikusi ondoren, animalien jabeek txakurrak beraien bizilekura eraman zituztela uste dute mugimenduko kideek. “Ziurtatu ezin dugun arren, badirudi, orain, txakurrak etxean dituztela. Hala ere, herritarrei deia egiten diegu zerbait arraroa ikusten badute egoeraren berri emateko”, gaineratu dute.
Horrez gain, txakurrak berriz ere “larri” ikusten badituzte, udaletxean salaketa jartzeko eskatu diete herritarrei.