Herritar denei edo kolektibo zehatzei —emakume, nagusi, ume…— mugatutako batzarrak bideratzen ari dira, baina denetan ikuspegi kolektiboa dute helburu. Esaterako, ‘Emakumeen Topaketan’ gizon zein emakume, ume zein heldu, herritar askori eragiten dieten kezkak azaldu ziren. “Autoak, gaur egun, alde denetara heltzen direla oso barneratuta dute, espazio dena hartzen dutela, eta, alde horretatik, erabakiren bat hartu behar dela”, dio Saioa Zuazubiskar Urak Bide Taldeko kideak. Oinezko bide denei lotura emango liekeen sare baten beharra ere plazaratu zuten. Eraikin publikoetarako irisgarritasuna da beste kezka bat. Esaterako, osasun zentroaren kanpoaldeak aparkaleku batera ematen du, eta anbulantzia ezin da atera heldu larrialdirik balego.
Eskolarako bideak eta eliza inguruko zonaldeak kezka biak batzen ditu. Irisgarritasunaren aldetik, eskolara joateko itzuli handia eman beharra dago atzetik, eta aldapa gogorra egiten zaie ume-karrotxoekin doazenei, batez ere edadekoak badira. Auto-oinezko ereduari dagokionez, sasoi batean eliza inguruan plaza lez erabiltzen zena, gaur egun aparkaleku moduan erabiltzen da, eta umeak hesietatik barrualdera baino ezin dira jolastu.
Beste kezka batzuk errepide nagusiaren beste aldera bizi direnen gainekoak dira. Bidea gurutzatzeko pasabide bakarra dute; gainera, alde horretan ez dute espaloirik semaforora edo autobus geltokira heltzeko.
