"Ahalik eta soinu naturalena lortzeko erabaki dugu Garaten grabatzea"

Zer sentsazio daukazue diskoaren aurkezpenagaz?

Ioritz Alejo: Gu apur bat nekatuta eta guzti gaude diskoagaz, baina azken asteotan jendeak asko galdetu digu disko berriaz. Zelanbait, jendeak berak kutsatu digu emozioa. 

Eta aurkezpen kontzertua zelakoa izango da?

Iñaki Larrañaga: Areto oso txikia da Ateneoa, oso beroa, eta giro oso polita sortzen da.

Jon Revilla: Oso hurbil daukazu publikoa. Oso gustura jarduteko leku ezin aproposagoa da.

I.A.: Disko berriko kantak ez ezik, maketakoak ere joko ditugu, eta bertsio bat ere bai, Hellacopters taldearena.

I.L.: Kontzertu arina izango da, hasi eta amaitu egingo dugu; berba askorik bakoa izango da, kantatik kantara tarterik gabekoa. Horrela gustatzen zaigu.

Zer azpimarratuko zenukete disko berri honen inguruan?

I.A.: Sonichaos izena du, abesti bakoitzak bere estiloa daukalako. Kanta batzuek gehiago dute punketik, distortsio gehiagogaz, eta beste batzuk anplifikadore klasikoagaz grabatu ditugu...

I.L.: Soinu aldetik kaos bat da diskoa. Itxura batean, rock-and-rolla da dena, baina hainbat ñabardura daude.

Bilatutako zerbait izan da hori?

I.A.: Bilatzen ez dakit, baina probatzen ibili gara, bai.

I.L.: Ni orain gutxi sartu naiz taldean, eta kanpotik begiratuta, iruditzen zait maketan abestiak linealagoak zirela soinu aldetik. Oraingoan estudio profesional batean grabatu dugu: ahalik eta soinu naturalena lortzeko aukeratu dugu Garate. 

J.R.: Guretzako esperientzia ikaragarria izan da Garaten grabatu ahal izatea. Hilabete egon gara han lanean, lagunartean. Batzuk bertan geratu ginen lo egitera, eta lanean jardun ginen arren, ia-ia oporrak izan ziren.

Zer aldaketa gertatu da disko honetan, lehen egiten zenuten musikarekin alderatuta?

I.L.: Disko berrian punk-rockari punk zatia kendu diogula uste dut, eta rolla gehitu diogula. Punk-rocketik rock-and-rollera egin dugu. Estudioan naturaltasuna lortu, eta entsegu lokalean garena diskoan islatu dugu.

J.R.: Maketako soinuak ukitu modernoagoa dauka.

Maketa aurkeztean esan zenuten bost urte barru grabaketa horrekin harro egon nahi zenuketela.

J.R.: Ez gara batere damutzen disko hura grabatzeaz, ondo dago. Baina egia da aurrera egin dugula, asko hobetu dugula.

I.L.: Apustu handia egin dugu disko honetarako: estudio on batean grabatu dugu, eta diseinua ere asko zaindu dugu. Seguru nago bost urte barru harro egongo garena disko berri honetaz.

Iaz irabazi zenuten Durangaldeko Maketa Lehiaketako saria bultzada izan da grabazioa era honetan egiteko?

I.L: Bultzada inportantea, inflexio puntua izan zen sariaren 1.800 euroko oinarria edukitzea. Hori barik ezingo genuke horrelako grabazio batean sartu.

J.R: Diru hori barik ez genuke pentsatu ere egingo Garate estudiora joatea diskoa grabatzera.

Disko berria atzerrian ere erakusteko gogoz