Abadiñoko EH Bilduk prentsa ohar bidez Laubideta inguruko auzotarren egoera salatu du. Oposiziotik jakitera eman dutenez, herritarrek "urteak" daramatzate zonaldean dauden hirigintza-arazoentzako erantzun bat eskatzen, "baina ez da konponbiderik iristen". "Auzotarrek eskatzen dutena oinarrizkoa da. Edozein auzotan bete beharko liratekeen gutxieneko gaiak dira: segurtasuna, irisgarritasuna, aparkalekuak eta mugikortasuna", jarraitu dute EH Bilduko kideek.
Oharrean jakitera eman dutenez ondorengo arazo hauek dituzte: zoruko adokinak apurtuta edo mugituta daude, autobus geltokietarako sarbideek ez dute arrapalarik edo igotzeko sistemarik, tunela zaindu gabe dago eta aparkamentu faltak bertakoen segurtasuna eta irisgarritasuna kaltetzen ditu, besteak beste.