Abadiñoko II. Enpresa Proiekturako Lehiaketarako deialdia zabaldu dute

Abadiñoko Udalak 5.000 eurogaz sarituko du Matiena, Zelaieta edo Muntsaratzen enpresa berri bat sortzeko proiektu onena. 

Abadiñoko II. Enpresa Proiektuen lehiaketarako deialdia zabaldu dute. Maiatzaren 1etik urriaren 31ra bitartean aurkeztu daitezke egitasmoak. Udalak 5.000  euroko saria emango dio lehiaketa irabazten duenari. Sariaren %80 enpresa berria martxan jartzen denean emango da, eta gainerako %20a martxan jarri eta urtebetera.

Iñaki Rekaldek, Abadiñoko Ogasun, Ekonomia Sustapen eta Enplegu zinegotziak azaldu duenez, "asmoa da enpresa eta enplegu berriak sortzen laguntzea Abadiñon, koronabirusak sortutako krisialdiari aurre egiteko pizgarriak hain beharrezkoak diren garai honetan". 

Lehiaketak bereziki sarituko ditu produktu, prozesu edo zerbitzuetan ekimen berriak ekartzeaz gain aberastasuna eta enplegua sortzeko eta Abadiñoko merkataritza suspertzen laguntzeko gauza diren enpresa-ideiak, udal ordezkariek azaldu dutenez. Besteak beste, originaltasuna, negozio-planaren definizio-maila, enpleguaren sorrera eta aukera-berdintasuna, hartuko dira kontutan. 

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.