Udal arduradunek esan dutenez, eraikinaren egitura aztertzeko 2020an egindako txosten batek gomendatzen zuen kalte horiek bi urteko epean konpontzea. Udalak finkatu duen lan-egutegiaren arabera, obra-proiektuaren idazketa martxoan amaituko dute, proiektua Aste Santua baino lehen lizitatuko da, eta lanak udan hasiko dira. Proiektua Eusko Jaurlaritzari helaraziko diote, kostuaren %60raino finantzatu dezan. Eraberritze lanak aprobetxatuz, eskoletako berokuntza sistema hobetuko dute.
Orain dela urte bi Abadiñoko Udalak Haur Hezkuntzako eraikina Traña plazara aldatzeko proiektua izan zuen mahai gainean. Horrela, hustutako orubean bi etxebizitza-eraikin eta lurpeko aparkaleku bat egitea gura zuten. Baina, udalak argitu duenez, txosten batek dioenez eraikin berria gune urperagarri batean egongo litzateke. Arrazoi horregatik proiektu hori alde batera utzi dutela gaineratu du udalak.