Andres Fernandez Abadiñoko Udaleko arkitekto teknikoaren arabera, Ingurumen Sailak eskatutako neurri guztiak hartu ditu enpresak. Tximinien iragazkiak aldatu, harea-biltegia hermetikoki itxi, kamioiek harea deskargatzen duten lekua aldatu, patioen garbiketaren maiztasuna gehitu, eta kanpoko harea-edukiontzia kendu dute, besteak beste.
“Ikusita arduradunek eskatutako neurriak hartu dituztela, baina hala ere arazoa ez dela guztiz konpondu”, Abadiñoko Udalak eta Eusko Jaurlaritzak egoeraren jarraipena egiten segituko dutela adierazi du Fernandezek. Arkitekto teknikoak aurreratu du enpresaren instalazioak sakonago aztertzeko asmoa daukala Jaurlaritzak, nahiz eta bisita horretarako datarik ez duten oraindik ipini.
Fernandezek azaldu du, enpresak hartutako neurrien eraginkortasuna baloratzeko, auzotarren iritzia ere jaso zutela urte hasieran, eta denerikoak izan zirela erantzunak. “Batzuek diote igartzen dela hobekuntza, eta beste batzuek, aldiz, beraien etxeetako balkoiak belztuta agertzen direla orain ere. Guk gure bidez ikusi ahal izan duguna da gutxitu egin dela kutsadura, baina oraindik ere gertatzen direla isurketak”, adierazi du.
Fernandezek nabarmendu duenez, egindako azterketen arabera isurketak ez dira osasunerako kaltegarriak. Abenduan egin zuten ikerketaren arabera, 10 mikra baino gehiagoko partikulak dira Muntsarazko zoruan pausatzen direnak, eta ez dago arriskurik horiek arnasteko. Egindako azterketen arabera, legeak ezarritako parametroen barruan dago Muntsarazko airearen kalitatea: ona edo oso ona da, neurketen arabera.