Trinketearen ostean atondu dituzte abelburuen karpak, eta trinketearen aurrean baserriko produktuen 94 saltokiak. Abelburuei dagokienez, iaz berreskuratu zuten lehiaketa burutu dute aurten ere: 300na euroko saria eta garaikurra jaso dute azokako sortarik onenak, herriko bigantxarik onenak eta herriko zezenik onenak. Abadiñoko lau abeltzainek hazitakoak izan dira azokara eramandako abelburuetako batzuk.
Nekazaritza azokan, ohi bezala, baserriko askotariko produktuak izan dira eskuragai, eta aurten, lehenengoz, nekazaritza ekologikoari buruzko standa ipini du ENEEK elkarteak.
Txanbolin taldeko txistularien kalejiragaz hasi da gaurko egitaraua, 09:00etan, eta urtero bezala, Ferialekuan Durangaldeko bertsolarien jarduna ere izan da entzungai. San Blas eguna amaitzeko, idi probak eta kontzertuak izango dira, gaur gauean, aukeran. Bihar, San Blas Txiki eguna ospatuko dute, eta etzi ere jai-giroa nabaria izango da Zelaietan.
Jose Luis Navarro alkateak, Iñaki Rekalde zinegotziak eta Iratxe Uriarte BBKren gizarte ekintza arloko ordezkariak eman zituzten martitzenean azokaren inguruko datu eta azalpenak, eta San Blas azokak eta bestelako azokek ere baserritarren eta kontsumitzaileen arteko harreman zuzena errazten dutela azpimarratu zuten.