“Gazteei aisialdiko ekitaldiak euskeraz egiteko aukera emateko” Abadiñoko Udalak Aisialdi Gaztea egitarauaren hirugarren edizioa jarriko du martxan. 10-18 urte bitarteko gazteei zuzendutako egitarau honen ekintzak asteburuetan burutuko dituzte. Iaz 30 neska-mutilek hartu zuten parte antolatu ziren ekintzetan. Gaupasa bat, sukaldaritzako tailerrak eta pelikula emanaldiak egin zituzten esaterako.
Bariku honetan egingo duten jaian izena emateko epea zabalik dago urriaren 26ra arte. Errota kultur etxean zein udal mediatekan izena eman daiteke. Bost eurotako bermea jarri beharko da (jaiaren egunean itzuliko dietena). Jaia 18:00etatik 21:00etara izango da Abadiñoko probalekuan. Konfiantza eta jakintzazko jolasak egingo dituzte, zunba saio bat burutuko dute. Jaiari amaiera emateko afari herrikoia prestatuko dute bakoitzak etxetik ekarritako janariarekin.