Hartutako konpromiso hori bermatzeko, esleipen prozesuak arautzen dituzten baldintza orrietan klausula sozial horiek errespetatzea eskatuko die udalak lehiaketara aurkezten diren enpresei: “Lanari, gizarte-segurantzari, lan-osasunari eta segurtasunari buruzko xedapenak” betetzea. Enpresek klausula horiek bete ezean, kontratuak eten eta zigorrak ezarriko ditu Abadiñoko Udalak.
ELA sindikatuaren mozioa babestu arren, LABek ere udal kontratazioen inguruko idatzi bat aurkeztu berri duela azpimarratu zuen EH Bilduko Mikel Urrutiak. “Ez dugu ulertzen zergatik ELArena bakarrik ekarri duzuen plenora”, esan zion Urrutiak alkateari. Bi sindikatuek beraien mozioetan egiten dituzten eskakizunak berberak direla erantzun zuen alkateak, eta onartutako idatziak bien eskakizunak islatzen dituela.
Azken urteetan Abadiñoko Udalak azpikontrataziorako daukan joera ere kritikatu zuen Urrutiak. “Behin-behinekotasuna gutxitzeko konpromisoa hartu zuen udalak aspaldi, baina ez da sinatutakoa bete”. Alkateak erantzun zuen Madrilgo gobernuaren murrizketek “lotuta” egon dela udala, eta ez dela gobernu taldearen borondatea kontrataziorik ez egitea.