Emakumeentzako Jabekuntza Eskolaren eskaintza oparoa zabaldu du Abadiñoko Udaleko Berdintasun sailak. Osasun arloko hainbat ikastaro eskainiko dituzte, esaterako; Pelbis-zorua gogortzeko ikastaroa, edo Zer daki zure gorputzak zuk (oraindik) ez dakizunik? izenburukoa, kasurako. Gainera, jendaurrean hitz egiteko teknikak ikasteko, zein coaching edo mindfulness saioetan parte hartzeko aukera eskainiko dute. Autodefentsa feministako teknikak praktikatu, feminismoaz gogoeta egin, zein gai feministen inguruko ilustrazio tailerrean parte hartzeko aukera ere luzatu diete emakumeei.
Joan zen astelehenean hasi zen Jabekuntza Eskolan matrikulatzeko epea, eta ikastaro bakoitza hasi baino hamar egun lehenagora arte ere egongo da izena emateko aukera. Udalaren www.abadiño.org webgunean eskuratu daiteke informazioa, eta Errota eta Txanporta kultur etxeetan, zein berdintasuna@abadiano.org helbidera idatzita ere eman daiteke izena.
Urrian hasiko dira Jabekuntza Eskolako ikastaro batzuk, baina ikasturtean zehar abiatuko dituzte beste hainbat.