"Gu ez gara politikari profesionalak, ezta sistema kapitalista eta patriarkal honen pieza bat gehiago ere" azpimarratu zuten EH Bilduren hautagaiek: "Gu sistema hau eta udal hau eraldatzeko helburua dugun herritarrak gara".
Udalean erabakiak hartzeko modua aldatu beharra dagoela azpimarratu du, besteak beste, Abadiñoko EH Bilduk. Horretarako, asteburu honetan etxez etxe banatu duten herri programan jaso dituzte hainbat proposamen, hala nola, arlo bakoitzean diharduten herritarrek parte hartuko duten kontseiluak eratzea, auzo batzarrak egitea, edota herriarentzat estrategikoak diren gaiak erreferendum bidez erabakitzea.
Ekitaldia egin zuten Muntsaratz auzoari ere erreferentzia egin zioten, zapatuko ekitaldian. "Azken urteetan hazkunde handia" izan duela auzo horrek, baina "udalak bigarren maila batean" utzi duela kritikatu zuten. EH Bilduk azpimarratu zuen, "Muntsaratz lo egitera etortzeko auzoa izatetik auzo bizia izateko bitartekoak" ipiniko dituela.