Maitzaren 3 arteko epea zabaldu dute Abadiñoko Udalak eskainiriko udalekuetan eta udako ludotekan izena emateko. Arduradunek jakinarazi dutenez, Udal Mediatekan edo Errota kultur etxean entregatu behar dira eskabideak.
Abadiñon erroldatutako 3 eta 5 urte bitarteko umeei dago zuzenduta ludoteka; eta 2002 eta 2006 urteen artean jaiotako neska-mutikoek eman ahalko dute udalekurako izena. Uztailaren 1etik 12ra bitartean egingo dituzte saioak.
Arduradunek azaldu dutenez, 60 euro ordaindu behar da matrikula bakoitzeko, baina bi anai-arrebak edo gehiagok izena ematen badute, deskontua egingo diete.
Gurasoekin batzarra
Udalekuei zein udako ludotekari buruzko informazioa emateko, gurasoekin batzarra deitu dute antolatzaileek. Ekainaren 21ean, 18:30ean, Errota kultur etxean egingo dute batzarra.