"Langileak beldurtu gura dituzte kaleratze honegaz"

Bi urtez ELA sindikatuko delegatua izan da Asier Ezenarro Pierburg-en eta joan zen astean kaleratu zuten; protesta burutu zuten barikuan, enpresa aurrean.

Joan zen astean kaleratu zuten  Asier Ezenarro elgetarra Pierburg enpresatik. Diziplinazko kaleratzea ezarri diote. ELA sindikatuaren delegatua izan da azken bi urteetan Ezenarro, eta sindikatuko bere kideek diotenez, “enpresako bulegoan delegatu moduan egin duen lana deseroso zaielako kaleratu dute: langilegoa beldurtzea da lortu gura dutena”. Eta Ezenarroren ustez lortu dute: “Beldur itzela dago, inor ez da mugitzen; nahiago dute isilik geratu, pankartaren atzean agertuz gero hurrengoak izango direla uste dutelako”.

Mikel Elizburu ELAko kideak dioenez, tailerrean langileen eskubideen alde egiten zebiltzan lana bulegora zabalduko zutela ikusi zuen enpresak, eta delegatuekiko jazarpenari ekin: “Ordu sindikalak hartzeagatik, aparteko ordurik ez egiteagatik, edo prekarietatea salatzeagatik presioa egiten hasi zen enpresa duela bi urte”. Elizburuk dioenez, “Asierrek delegatu legez egin duen funtzioa mugatu guran ibili dira urteotan”.

Sindikatze eskubidearen kontrako eraso oso larritzat du Asier Ezenarro delegatuaren kaleratzea ELAk. Horregatik, Durangaldeko, Busturialdeko eta Lea-Artibaiko bere ordezkariak batuko ditu gaur enpresa aurreko kontzentrazioan, kaleratzea gogor gaitzesteko. Demanda aurkeztu du sindikatuak, eta epaitegiek arrazoia emango dietela seguru daude. Pierburg enpresako ELAko delegatuak jasaten ari diren jazarpena ere salatuko dute helegitean.