Kirol munduagaz duten hartuemana erakustea da aurtengo helburua.
Durangaldeko Adimen Urritasunaren Eguna antolatu dute domekarako Geu Be elkarteak eta Abadiñoko Udalak, Traña-Matiena auzoan. Aurten, adimen urritasuna dutenek kirol munduagaz duten hartuemana zelakoa den azaltzen saiatuko dira hainbat ekitaldiren bidez.
Goizeko 10:00etan futbol partiduak jokatuko dituzte Traña-Matienako kiroldegian. Besteak beste, adimen urritasuna dutenekin lanean dabiltzan Arabako eta Gipuzkoako elkarte banak parte hartuko dute. Ostean, futbol kantxa alboan dagoen pilotalekura joango dira eta, 13:00etatik aurrera, pilota partiduak jokatuko dituzte. Sari banaketarekin hasi aurretik, Abadiñoko sokatira taldeak erakustaldia eskainiko du bertaratzen direnentzako.
Diskoteka kiosko plazan
Arratsaldean, ospakizun giroa emango diote egunari eta kalera aterako dituzte ekitaldiak. Horrela, 16:00etan, diskoteka musika dantzagarria ipiniko dute kiosko plazan eta batukada saioak ere egongo dira. Ostean, 17:30ean, umeentzako jolasak prestatuko dituzte plazan bertan. Egunari amaiera eman aurretik, txokolatada ere egingo dute.