Gaur jokatu da Bilbon Bizkaiko Eskolarteko XXIX. Bertsolari Txapelketako finala. Bertsolariak bi multzotan banatu dira, Maite Berriozabal berriztarraren agindupean: hamalau urtera artekoak eta hamalautik hamazortzira artekoak.
Txikien mailan parte hartu du Txaber Altube Abadiñarrak. Iaz ere maila berean aritu zen eta txapela jantzi zuen, aurten ostera, saio ederra burututa bigarren egin du. Iker Larizgoitia Mungiarrak eskuratu du txapela, ideietan argi eta erantzunetan bizi-bizi arituta.
Nagusien mailan lehia estua bizi izan dugu Nerea Ibarzabal markinarraren eta Malen Amenabar lezamarraren artean. Buruz-buruzkoan jokatu dute txapela eta azken urteetan ohikoa dugun moduan Markinara eraman du txapela Nerea Ibarzabalek. Juanjo Respaldiza bertso irakasleari eskaini dio azken agurra.
Juanjo eztou kantau gura
Esan dugu mila aldiz
Sei urte pasatu dira
Ta oindik bardinetan gabiz
Baina zuk zure euskara
Bizkaitar fin eta garbiz
Konbentzitu ein gaituzu
Urtez-urte behin da barriz
Zenbat palmera ta barre
Zenbat bertso ta zenbat hitz
Oin betea dan bizia
Ze hutsa izango litzaken
Zugatik izan ez balitz