Korrikan 36 migratzaileri Irunen (Gipuzkoa) eta Hendaiaren (Lapurdi) arteko muga igarotzen laguntzeagatik zazpi aktibista epaituko dituzte datorren urtarrilaren 28an. Aktibistei babesa emateko eta inmigrazio politikak salatzeko manifestazioa egingo dute domekan, "desobedientzia ekintza" hori bultzatu zuten kolektiboek deituta. Aktibisten "berehalako kargugabetasuna" aldarrikatuko dute.
Irungo Ficoba erakustazokatik abiatuko den manifestazioan parte hartzera deitu du Otxandioko Hamaika Lore kultur aniztasunaren aldeko taldeak. Era berean, Korrikan migranteei lagundu zietenen alde deitutako autoinkulpazio kanpainagaz bat egin dute. Atzo arratsaldean agiriak batzeko ekitaldia egin zuten.