'Euskara, bestela ez gara' izeneko horma-irudia marraztu dute asteon Otxandion

Lau metro garai eta hogei metro luze den horma-irudiak euskaldun izatearen altxorrik handiena zein den gogoratuko du aurrerantzean Otxandion. 'Euskara, bestela ez gara' leloa irakurri daiteke Irantzu Lekue gasteiztarrak diseinatu eta pintatu duen horma-irudian.

Inguruko mendiak eta natura herriguneagaz lotzen ditu irudiak. "Gure hizkuntzak antzinatik gaur egunera izan duen bidea erakutsi gura izan dut, mendi giroan sortu zenetik herrietan garatu zen arte", azaldu du Lekuek udalaren enkarguz margotu duen horma-irudiari buruz. Irudiko albo batean Vulcano iturria ageri da. "Iturritik urak etenik barik jarioan irteten duen moduan, euskararen erabilerak ere etenik bakoa izan behar lukeela islatu gura du", dio.

Herritarrek margotzeko aukera izan dute. Joan zen barikuan eskolako ikasleek, eta asteburuan herritarrek.

Lekuek makina bat margo-irudi egin ditu; tartean, bi Iurretan. Oraintsu Katalunian izan da horma-irudi bat egiten, eta hurrengoa Berriatuan egingo du.

Herritarrek eta eskolako gazteek horma irudia margotzen lagundu dute:

 

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.