Bizilagun etorriberriak, beharbada, gustura egingo lituzke barraren alde batetik bestera dauden bost metroak, egunero ikusten dituenekin berriketalditxoa hasteko. Eta, bertakoak ere desiratzen egon daitezke ongietorria egiteko, baina bada bien artean harresi ikusezin bat hartueman hori eragozten duena. Horma hori eraitsi, eta herrira bizitzen datozenei integraziorako erraztasunak eskaini nahian, harrera talde bat sortu dute, Otxandion. Izan ere, “sarritan horixe da zailena, lehen kontaktua egitea”, dio talde horretako Mikel Sanchezek.
Otxandioren etorkizuna eraikitzea helburu duen Herri-ola herrigintza egitasmoko Migrazio taldetik irten zen ideia. Sasoi batean udaleko batzordea zena, talde autonomoa da gaur egun, eta hainbat helburu ditu: herriko kultur aniztasunari buruzko gogoeta egitea, herritarrei eurei begirako lan pedagogikoa garatzea..., eta kanpotik datozenei integrazio inklusiborako erraztasunak eskaintzea. Bide horretan, Harrera Protokoloa landu dute, azken udalbatzarrak onartu zuena: “Iruditu zitzaigun interesgarria izango zela herrira datorren jendeari laguntzeko mekanismo bat martxan jartzea”, gogoratu du Migrazio Taldeko Iñaki Pujanak. Herritar berri denei begirakoa da, datorren lekutik datorrela ere: Euskal Herriko beste herri batetik, Europatik zein mundu zabaletik.
Protokolo horrek hainbat lan tresna eskaintzen du —herriko eta udaleko azpiegitura zein baliabideak hainbat hizkuntzatan jasotzen dituen Baliabideen Gida, esaterako— eta Harrera Taldea da horietako bat. Zortzi lagunek osatzen duten taldeak kanpotik datorrenari herriko integrazioan ahalik eta erraztasun gehien ematea du helburu: herria ezagutzen lagunduz, ohiturak erakutsiz, dudak argituz, hartuemanak erraztuz… “Sarritan, gatxa da lehen pauso hori eurek ematea, eta Harrera Taldeagaz bide hori erraztu gura dugu”, dio Migrazio Taldeko Joseba Irabazalek.
Errolda egitera lehenengoz doan edonori eskainiko diote Harrera Taldearen laguntza. Bere datuak fitxa batean bete, eta Harrera Taldekoak jarriko dira beragaz hartuemanetan.
Kasuan kasuko beharrizanen araberako zerbitzua eskaintzeko diseinatu dute Harrera Taldea: “Oztopoak askotarikoak izan daitezke. Hizkuntzari lotutakoak, kulturalak, eta baita ekonomikoak ere, gerta daitekeelako pertsona horrek edo horiek hemengo aisialdi ohiturak edukitzeko modurik ez izatea”, dio Pujanak. Horregatik, garrantzi handia ematen diote aurrelan horri, eta egoera desberdinei irtenbidea emateko egituratuta daude: “Bakoitzaren ezaugarriak ikusi, eta horren arabera erantzuna ematea da helburua”.
Esaterako, trabetako bat hizkuntza bada, zerbitzua hainbat hizkuntzatan emateko moduan daude, arabieraz, esaterako. Adin tarte desberdinetako jendea ere badute: “Behardaba, gazte bati errazagoa egingo zaio bere adin beretsuko batekin egotea”, dio Ana Nogueirak. Den-denek badute ezagurri komun bat: “Komunikatzeko gaitasuna. Edonori ongietorri on bat egiteko gaitasun osoa dute”. “Beste profil bateko jendea behar izanda ere, gure inguruan badago une edo behar puntualetan laguntzeko prest dagoenik”, gehitu du Pujanak.
Harrera protokoloa onartu berria da eta oraindik ez dute eskaririk izan, baina desiatzen daude hasteko eta ikasteko.
Euren ideia beste herrietan txertatzen laguntzeko ere prest daude. Orain aste bi, Zaldibarren izan ziren, udal harek antzeko zerbitzua sortzeko interesa duelako. Otxandiarrek euren esperientziagaz lagunduko diete.
“Ezagun bategaz jendea irekia da, baina hori barik gatxagoa da” |
