Otxandiok 1961ean hartu zuen lehenengoz Durangaldeko Txistulari Eguna; harrezkero 1981ean eta 1994an ere bai. Martxoaren 16koa laugarrena izango da, beraz.
Batuko diren eskualdeko 40 txistulariek kalejira hasiko dute 11:00etan, eta 13:00etan Santamaña elizan kontzertua eskainiko dute, Udal Musika Bandak eta Oihandi Abesbatzak lagunduta; Jabier Urigoitiak eta Alex Agirrebeitiak zuzenduko dituzte 100 bat musikoak.
Besteak beste, herriko melodia bi joko dituzte: Katalintxo lore ederra (Andres Granadosek prestatutako bertsioa) eta Otxandio. Gero, txistulariek Erregelak dantzatuko dituzte udaletxe aurrean.